حوار على هامش سقوط أستاذية العالم

كتبت: لو أنت شاب مؤمن برسائل حسن البنا ودعوته والإخوان، يبقى إنه لأمرٌ مشين إنك تفتكر إن مرسي دة قائد أو بديع دة بيفهم أو خيرت دة أهم من مجرد بقال.

- برضه محتاج تشوف الصورة كاملة. مرسي وقف في وجه طوفان الفساد حتى بضعفه كان بيدي فرصة لغيره من الشرفاء يبنوا قاعدة شعبية وسمعة

· مرسي اللي عمل تصالح مع رجال أعمال مبارك، وقف في وش الفساد؟!

- هو اللي عايز يرفع قضية بيرفعها فين ومين بيحكم له؟ نيابة وقضاء مبارك وينفذ داخلية مبارك ويتدخل جيش مبارك وقت اللزوم

· حلو.. طالما مش أدها، يبقى ما تدخلش.. ابن قيادي إخواني من الصف الأول قال: الحكم حيغرق الجماعة، والخوف يغرق معاه المشروع الاسلامي!

- كنت بلومه على تأجيل المواجهة وفهمت انه لازم يملك ادواته، بطء التنفيذ مكانش سبب الانقلاب. دي حاجة كلنا منتظرينها من 30/6/2012

· لازم نعترف إن إمكانياته كانت محدودة

- لحد 30-6 كنت مصدقة ان فشله السبب ولو كان حد اقوى كان قدر يوقفهم. دلوقتي اشك هي مجرد جولات لان الفاسدين مش هيخلصوا مرة واحدة

· اختزال الفشل في الفساد، هروب من مواجهة الحقيقة. الفشل سببه اللهفة على التمكين

- اللي كان باقي رجل مبارك نفسه. او مرشح المجلس العسكري حمدين او البرادعي باجندته. كان لازم حد يتدخل ويجازف

 · لا مكانش حد لازم يتدخل أو يجازف. اللي كان حيحكم كان حيشيل ليلة سودا على دماغه. كنتم سيبوها علشان تشتروا المستقبل.

- مكانش هيبقى فيه مستقبل كانت هتبقى بيع للثورة ببلاش. نفس الوجوه اللي رجعت النهاردة كانت هترجع من سنة وتستمر. لازم كل ما يرجعوا نواجه

· يا فندم نواجه مين؟ الموضوع مكانش فساد. الموضوع كان عدم فهم لطبيعة مجتمع إنتم تصدرتم لحكمه.

- انتم مين؟ الاخوان ولا اي حد بمرجعية اسلامية يبقى مش هيفهم المجتمع اللي عايش فيه طول حياته عشان اللي بيفهم لازم يبقى ليبرالي/علماني

· الاخوان هما اللي مفهومش المجتمع.. مشكلة اللي مراجعهم إسلامية إنهم اختزلوا مشروعهم في الاخوان

- هيستمروا مرة يتصدموا ويقفوا يخططوا ومرة ينفذوا والناس لازم تفضل صاحية لهم لحد ما يخلصوا تدريجيا على مر السنين وزيهم السلطة العسكرية

· الناس عايزة الجيش.. بلد أسسها الجيش، والناس جربت وللأسف اللي جربوه رماهم في حضن الجيش. يبقى انتظار معركة لن تحدث، مجرد هروب برضه.

- قولي بقى إن البرادعي لا تخلى عن مبادئه ولا غير كلامه ولا راضي بحكم السيسي وتحت امره عشان يوصل للمنصب... قولي البرادعي متحرقش

· كلهم اتحرقوا.. المشكلة مش في اللي اتحرقوا، المشكلة في اللي دخل على منصب وعلى دور هو مش مستعد له، فضاع الكرسي وضاعت سمعته وهيبته.

- انت عارف ان كثير منهم عارضو الاخوان وانا منهم. بس الخطة بتقول دول القوى الجديدة اجمعهم في سلة وسيب الاعلام عليهم والناس هتصدق

· الربط بين مشروع الاخوان ومشروع الاسلام السياسي، هو اللي ضيع الاتنين. ليه محدش اتعلم من تجربة أربكان في تركيا وتجربة أردوغان؟

- بالنسبة لتجاهل التدخل الخارجي ومصالح الدول الثانية في المنطقة؟ وكأن كل مشكلة مرسي كانت الجيش والداخلية والبنزين؟

· حدثيني عن "صديقي بيريز". عن "وساطته" بين حماس وإسرائيل. عن علاقاته الدافئة مع أمريكا وإدارتها. عن علاقاته المتميزة مع إيران.

- واضح ان مرسي الوحيد في المنطقة اللي ممنوع عليه يكلم حد برة البلد... وفي نفس ذات الوقت هو المسئول عن تبويظ اي علاقات!

· ما تختصريش الفشل في مرسي بس!